Hakerat rumunë përbëjnë kërcënim ndërkombëtar në rritje

22/05/2008

Rasti më i gjurmuar i hakerit rumun Vladuz i cili u tall për vite me e-Bay është vetëm maja e ajzbergut të një dukurie në Rumani. Ajo po tërheq vëmendjen e autoriteteve ndërkombëtare dhe medias.

Nga Paul Kiokoiu për Southeast European Times në Bukuresht – 22/05/08

Hakerat rumunë po synojnë viktimat e huaja. [Dosje]

Autoriteteve të SHBA ju deshën vite të kapin hakerin rumun Vladuz, emri i vërtetë i të cilit është Vlad Konstandin Duikulesku, një i ri gjimnazist nga Bukureshti, i cili paligjshmërisht hyri në bankën e të dhënave të e-Bay nga 2005 në 2007 dhe shkaktoi 2 milion $ dëm në shitjet online të sajtit.

Shërbimi i fshehtë i SHBA njoftoi autoritetet rumune që nga 2005 lidhur me shitjet online të një aplikimi që përmbante kodin burimor për hyrjen në faqen e internetit të e-Bay.com dhe kërkoi llogarinë e përdoruesit dhe fjalëhyrjen. Përfaqësuesit e e-Bay u përpoqën të identifikojnë se kush ishte shitësi duke pretenduar të ishin një blerës i interesuar për aplikimin.

Vetëm muaj më pas, Vladuz u arrestua në një operacion të përbashkët nga njësia rumune kundër krimit të organizuar dhe Shërbimi i Inteligjencës së Vendit. Ai i tha gjykatësit se ai haku shërbimet e e-Bay për shkak donte të ishte i famshëm dhe kishte braktisur shkollën sepse nuk kishte asgjë për të mësuar atje.

Ky është vetëm rasti i fundit në një sërë mashtrimesh online me origjinë në Rumani. Qendra e Ankimeve për Mashtrimet në Internet merr qindra njoftime çdo ditë, shumica e të cilave kanë të bëjnë me sulme interneti që vijnë nga Rumania.

Vitin e kaluar, autoritetet e SHBA akuzuan rumunin Florin Feçete për vjedhjen e më tepër se 120,000 $ nga tre vetë në një skemë mashtruese ku ai pretendonte t'u shiste atyre mallra që nuk i morën kurrë. Sipas një prokurori federal në Ilinois, Feçete ishte gjithashtu pjesë e një rrjeti i cili midis nëntor 2003 dhe gusht 2006, mashtroi më tepër se 2,000 vetë me deri në 5 milion $.

Shtypi i huaj ka nisur të përqëndrohet në këtë dukuri në rritje. Washington Post kohët e fundit mbuloi një rast në të cilin hakerat rumunë synuan 2,000 ekzekutivë korporatash në skema mashtruese të vjedhjes së identitetit. Një e-mail mashtrues ju dërgua ekzekutivëve maskuar si një thirrje gjykate që i urdhëronte ata të paraqiteshin atje. E-mailat përmbanin një add-on, një komponent i krijuar për të vjedhur emrin e përdoruesit dhe fjkalëkalimet që viktimat përdorën më pas, kur hynin në një sajt banke.

Sipas Los Angeles Times, një grup hakerash në Dragasani, Rumani që është quajtur qendra e mashtrimit të internetit, u synua nga ekspertët e anti-mashtrimit të e-Bay dhe agjentët e Shërbimit të Fshehtë. Gati 500 hakera në Dragasani vunë në shitje në internet bashkinë e qytetit dhe shkollat lokale dhe kishat dhe bile edhe një aeroplan gjuajtës MIG, sipas medias lokale. Policia tha se kishte qindra dosje nën hetim, por nuk u mbetet shumë për të bërë sepse shumica e viktimave të huaj refuzojnë të bëhen pjesë e një padie në Rumani.

Mashtrimi më i madh ndodhur ndonjëherë në internet u bë në pranverë të 2007, sipas një raporti në The Wall Street Journal. Hakerat rumunë komprometuan bankën e të dhënave të kompanisë tregtare të SHBA TJX dhe vodhën mbi 40 milion të dhëna të klientëve të saj.